Mr Meintjes loved three things: his wife Bielie, pudding and holiday.

- Melter

Sollie die bargain hunter, het op universiteit 'n 2-stroke DKW kar gekoop vir R36 en dit geel geverf met straatverf wat hy op 'n veiling gekoop het. Die kar se naam was Borrie Geel en ek kon hom hoor as hy verby die koshuis ry. Ek het vir my lisensie gegaan met Borrie Geel. Net daar verseg die kar om in enige ander rat as trurat te ry, en die speed cops het my weggejaag. Sollie het die karretjie kom haal en in trurat teruggery deur Pretoria se middestad - my maatjie Masan was by 'n busstop en het dit gesien (gedink hy kom gee haar 'n lift). Sollie het net verby gereverse en gewuif. Die kar was lank in reverse en ons het so in reverse "opgesit" as hy by my kom kuier het.

- Nollie

Die heel wonderlikste ding van Pappie was dat hy ten spyte van al die valsheid om ons vandag, die suiwer waarheid en eenvoud van die Evangelie van Jesus Christus onverskrokke met "no strings attached" verkondig het. So raar vandag. Dit is die grootste geskenk wat hy vir my gegee het.

- Ezelle

As pa Sollie nie vis gevang het by Ponta do Ouro nie, het hy op die strand gesit, toegepak met al die smouse en hulle goedere. Hy sal sê: "No not that, you bring tambotie, I buy tambotie!". Ons moes een keer 'n leë sleepwa afsleep net vir sy tambotiekissies.

- Jeanne

Een van ons lekkerste dae as kinders was toe Pa Sollie een Dinsdagaand by die huis aangekom het met 'n karavaan vol speelgoed wat hy op 'n veiling gekoop het.

- Kinders

Ons het visgevang op die 1ste meer by Kosibaai toe Pappie 'n baie groot vis gehaak het. Die vis het ons bootjie letterlik oor en weer oor die meer gesleep. Na omtrent 'n uur se gespook was die vis baie naby aan die boot toe die lyn skielik breek en Pa hom verloor. Ons het hom kant toe gevat waar hy vir baie lank op sy hurke gesit het met sy kop tussen sy knieë, hande oor die wange en ore. Hy't niks daar gesê nie, maar later wel dat hy eendag in die hemel sal uitvind watse groot vis dit was.

- Schalk

Pappie het my van kleins af sy voëlkind genoem, en gesê ek het vere vir hare. En dinge het toe presies so uitgedraai!

- Alida

Pa Sollie was so lief vir sy Skepper, sy familie en vakansie! Sy gunsteling stories was altyd oor visvang in 'n "cabin cruiser" of oor 'n kind of kleinkind se prestasies.

- Frikkie

Ek en my 2 bejaarde ouers - stoksiel alleen (ok Rooi was ook saam) - in verlate Khutse waar daar nie eers drinkwater is nie, met ons 2 Landies gegaan. Pappie was toe al "disabled" met sy bene. Ons hoor een aand die leeus brul en ek vat 'n wilde kans en sê: "Kom ons gaan soek hulle!" En daar gaan ek en die disabled bejaardes soos stoute studente en begin panic want ons het probleme met die Landy se battery gehad en Pappie sê net: "Anto moenie die kar laat vrek nie". Toe ons die leeus baie naby hoor brul, stop ek om hulle te soek en wraggies daar laat ek die kar vrek. Pappie sê: "Ok nou stoot ons", en hulle stoot so hangende aan die deure - maar ek kry nie die kar gestart nie. Na 'n paar failed attempts sê ek Pappie moet kom help. Ek is te bang en klim net oor van die bestuurders sitplek na die passasiers sitplek. Pappie maak die deur oop en klim sonder n bang haar uit en kruk homself om die kar tot by die bestuurders sitplek. Ek, Mammie en Rooi stoot en lag ons pap uit histerie – en Pappie start die Landy soos n pro! Hierdie is maar net een van die honderde lekker tye saam met Pappie!

- Antoinette

Daar is twee goed wat ek altyd van Oupa sal onthou: 1) sy kop vol rympies en liedjies wat op elke gepaste oomblik te voorskyn kom, en 2) sy diep-ingedagte gesigsuitdrukking (ook bekend as die Oupa-Sollie-dink-gesiggie) wat die meeste op die strandhuis se stoep gesien was. (Mag nie verwar word met 'n groot glimlag nie!)

- Carlie

Wie kan kersvader met een skulp bel? Wie kan sê dat hy 'n kamer vol gewere, messe, horlosies en wie weet wat nog het? Wie kan sê dat hy 'n Jeep uit sy sterfbed gekoop het? Wat is die verskil tussen Chuck Norris en Oupa Sollie Meintjes? Chuck Norris het nie 600 kameras nie! Oupa was 'n legend en ek sal hom altyd liefhê.

- Jan-Hendrik

Ek: "Pappie, wat is daar onder al daardie seile daar buite?" Pa Sollie: "Negosieware."

- Stefan

In 2017 raak Pa Sollie baie siek, dae lank in ICU, eindelik terug by die huis, baie swak en op suurstof. So ry ek baie hartseer plot toe, dis dalk my laaste kuiertjie. Daar aangekom is Ma baie onsteld. Pa het so pas vir sy foon gevra en 'n Jeep Cherokee gekoop. Ek is woedend en raas: "Pappie het jy nou wragtig uit jou sterfbed nog 'n Jeep Cherokee staan en koop!?", met 'n swak bewerige stemmetjie antwoord hy: "ag my ou Ekie, jy moet daai prys sien!" So ry ek weer baie hartseer 2 weke gelede terug plot toe met 'n sak vol Ivermectin, en hope pille. Dit gaan mistroostig, so tussen deur die chaos met die suurstof masjiene, word daar 'n "ongekontamineerde" sakkie met 'n koopkontrak aan my oorhandig wat asb dringend aan 'n agent gestuur moet word.

- Ezelle

By Pappie was daar altyd tyd vir 'n grappie. Toe hy my inloop by my troue – voor hy my "oorhandig" aan Frikkie – soen hy my en fluister in my oor: "Donna Martin moet ook skryf" – 'n inside joke wat al deur die jare kom en elke keer snaaks is.

- Antoinette

Oupa Sollie is die enigste Oupa met 'n quad bike, go-cart en motorfiets.

- Zandre

Oupa Sollie gee die lekkerste persente! Baie dankie vir my verjaarsdag geskenk.

- Dané

Ek hou baie van karre en Oupa het lekker karre gehad. Hy het ook vir my die vinnigste radio-beheerde kar in die wêreld gegee! Ek is so lief vir Oupa!

- Carel

Oupa het altyd 'n storie vir alles gehad, en hy het altyd alles onthou. My gunsteling storie was die een wat Oupa vertel het van die oom wat per ongeluk sy 4x4 in 'n boom op ge-"winch" het. Daar was ook skatte in elke kamer en kassie in sy huis en hy het presies geweet waar alles is! Ek gaan vir Oupa en sy stories vreeslik baie mis.

- Jean

Ek was nog bitter klein toe ek saam met Oupa op vakansie was. Ek was baie vreemd en het een aand aanhoudend gehuil. Mamma het nie geweet wat om te doen nie – sy het my nog nooit so sien huil nie. Nadat mamma en pappa ALLES probeer het – het Oupa vir my gebid en dadelik het ek ophou huil en rustig aan die slaap geraak. My gunsteling herhinnering van Oupa was toe Oupa my "inseëning" gedoen het. Ek sal dit nie kan onthou nie maar mamma en pappa sal my vertel. Dit was 'n fantastiese dag.

- Frederik

Dit was so lekker as Oupa die "Groooot" Haai was in die swembad. By Pilanesberg het Oupa gemors toe hy gedrink het toe se ek vir hom: "Klein slukkies Oupa!", net soos mamma vir my geleer het. Op daai vakansie het Oupa elke dag vir my n kar gegee as ek hom gaan groet het in die oggende in sy kamer. Ek was so opgewonde vir daai vakansie - ek het die hele dag by die skooltjie verkondig dat ek saam met Oupa en Ouma wildtuin toe gaan en toe Mamma my kom haal het ek gehardloop en dit vir die wêreld geskree!

- Cilliers

Toe ons klein was, Alida was so 2, moet ma Nollie die aand 'n Sondagskool vergadering bywoon. Pappie is aan diens met die kinders. Hy sê ons gaan 'n baie lekker speletjie speel. Hy trek toe 'n aaklige swart gorilla masker aan en jaag ons die hele aand met die masker in die huis rond. Geen wonder ons is glad nie bang vandag!!!

- Kinders

Pa was elke Saterdag by Bernardi Auctioneers in Kerkstraat. Vir een of ander rede het die afslaer hom Oom Bill genoem. Pa het hom nooit gekorrigeer nie. Oom Bill was vir baie jare lank een van Bernardi Auctioneers se beste kliënte.

- Schalk

Solly Meintjes was my eerste prokureer en ook die enigste in 35 plus jaar, ek het nooit 'n rekening van hom gekry nie hy was ook my vriend gewees, Solly eendag gaan ons saam op die strate van goud loop. Shalom.

- Martin

Sal nooit die dag vergeet toe nig Nollie my aan haar sleep voorstel. Dit was net voor my ma se tuinhekkie. Jy was nie gekys of het uitgegaan of so iets gedurende daardie tyd nie. Dit was jou sleep. Ja sê Sollie met sy ernstige gesig: "Ek is al deurgesleep." Ek hoor nounog hoe hy dit sê asof dit gister was. Hy het respek afgedwing en was nie iemand wat 'n mens maklik kon vergeet nie. Sollie, Eric het jou vooruitgegaan, maar ek weet julle is altwee nou by Jesus. Sterkte Nollie en al die familie!

- Cornelia

Ons was een vakanise as 'n groot gesin saam. Sollie het baie aandag aan Annelize geskenk en haar 'n "pikkertjie" genoem. Hy het gebare met sy hande gemaak en haar sommer goedig geterg. Sy het dit vreeslik geniet en het uit haar maag vir hom gelag. Baie dankie, Sollie. Hoe kan ons dit ooit vergeet? Jy het ons oorlede, outistiese kind se vakansie so plesierig gemaak.

- Mariana

Good day. Jy was soos 'n vaderfiguur van ek het baie by jou geleer. Verskillende soorte kameras. Daarvoor sal jy altyd in my hart wees.

- Shokie

Al my skoolvakansies wat ek op die plot deurgebring het onthou ek as vakansiesie: al die persentjies en al die bederfies. En al die dinge wat ons kon doen soos om met die matras teen die trappe af te gly en naderhand toe ons groter word oom Sollie se elektriese stoel die trappe op en af gerits het - dat die ou stoeltjie nie uitgebrand het nie was 'n wonderwerk! Dankie dat oom altyd my die geleentheid gegun het om van die vakansiehuis gebruik te maak anders het ek ook nooit die see gesien nie. Ek groet oom met 'n traan in die oog maar 'n glimlag op my mond. Kuier lekker met sussie en die res van die familie tot ons weer ontmoet.

- Lizl

Shoe ons is almal so lief vir Oom Sollie. Hy was net die beste! Hy het altyd gevra hoe dit met my en my hele gesin gaan. ELKE keer. Mense was so belangrik vir hom. Veral grappies en snaakse stories van die mense om hom. Hy het sy hele gesin geleer om 'n slegte situasie in n ander lig te sien, om die snaakse deel daaarin te sien. Soos toe hy in sy "home gym" (opgemaak van al sy vandisie kopies) vasgevang was, en vir Antoinette geroep het, en ons hom ge-ignoreer het omdat ons hom verwar het met "seker net n mal man wat ons roep"! Eerder as om kwaad te wees, het hy die storie so baie geniet en oorvertel na die tyd! Dis so hartseer dat Oom Sollie is nie meer hier gaan wees om die snaaks in die sleg te sien nie, maar as ek almal se herinneringe lees, voel ek bietjie beter want ek weet dat die deel van Oom Sollie nog lank in sy kinders en kleinkinders, gaan voortleef. Dankie Oom Sollie, jy was een in n miljoen en "your legend lives on"!!!

- Trisha

Dit was 'n besondere voorreg om vir die afgelope 35 jaar Sollie as 'n vriend, raadsman en medegelowige te kon ken. Ek kon altyd hom nader vir advies met die sake van die kerk & waar ons ooral saamgewerk het, of dit by sy kantoor, dissiplinêre sake of in die howe, het hy altyd tyd gemaak vir 'n vriendskaplike en ope gesprek. Gedurende hierdie gesprekke het ek hom leer ken as 'n persoon wat lief was vir die Here, sy gesin en ook sy medemens, en ja, daar was altyd geleentheid vir 'n gesonde grappie of twee. Ek sal werklik my vriend mis, maar weet dat hy die goeie stryd gestry het en dat daar vir hom vir ewig hemelse vreugde sal wees.

- Pieter

Ek het oom Sollie net 'n paar keer ontmoet, maar ek het 3 belangrike goed van hom geweet - hy was n wonderlike pa, 'n fantastiese oupa en 'n skatte jagter, nes Jean. Jean het van baba tyd af oor Oupa Sollie se rooi quad bike gepraat en Carel is met sy haarlyn gebore. Een van Jean se gunsteling stories is van Oupa Sollie wat n "kat in 'n sak" gekoop het, hy vertel dit elke geleentheid wat hy kan (Oupa het gedink hy koop 'n kamera maar dit was toe net 'n sak sout!). Oom Sollie gaan baie gemis word en hy sal nooit vergeet word nie. Hy het in die rukkie met sy klein kinders, 'n leeftyd se herinneringe gebou.

- Berenice

Rus in vrede oom Salie ek sal jou mis. Ek kan net dink hoeveel wonderlike "skatte" jou familie nog gaan ontdek oral in die skatkiste. Vrydagoggend veiling goed wat skelmpies ingesmokkel was en oral weggesteek is sodat Bielie tog net nie moet sien en raas nie! Meintjes kinders, julle pa het julle BAIE lief gehad. Nollie, hy het menigmaal vir my gesê dat daar nie'n wonderliker vrou op aarde is as sy eie vrou nie! Sy vrou en kinders was sy hele lewe (en natuurlik bargain hunting ook)!

- Mara

Ek onthou hoe Schalla eendag van Kollegetehuis af met Oom Sollie gesels het op die koshuis-telefoon in die voorportaal (want daar was mos nog nie selfone nie), na 'n baie tawwe inginieurstoetsweek of eksamen waarna Schalla maar bietjie bekommerd was. Oom Sollie het soos altyd uitgevra oor hoe dit met alles op Universiteit gaan en toe Schalk baie bekommerd begin verskonings maak vir alles wat kon bydrae tot moontlike ongewenste akademiese uitslae, toe sê Oom Sollie net baie rustig: "jy moet nét nie jou atletiek afskeep nie!"

- Plakker

Iemand soos Sollie kom maar eenkeer in jou lewe verby! 'n Steunpilaar vir sy mense en sy gesin, 'n goeie regsman, 'n kerkman, maar vir my 'n ware vriend. Ek en hy en Nollie en Masan ken mekaar van ons tweede jaar in 1967 af. Goeie tye toe al saam gehad! Wonderlike vakansies net ons vier! Lekker getoer na Madagaskar, Mosambiek en waar nog. Toe kom die kinders by en die heerlike tye vir ons twee gesinne het net aangegaan! Lekker kuier geleenthede saam gehad en natuurlik wonderlike vakansies oral in Suider – Afrika! Partykeer maar rowwe 4X4 paaie saam aangedurf, maar alles was groot pret. Ek onthou eenkeer sit hy saam met die kinders bo-op die dakrak van sy voertuig in Chobe en Nollie bestuur. 'n Bevoeterde olifant kom aangestorm en Sollie gee raad van bo-af wat sy moet doen. Daar is ongelukkig 'n groot klip voor haar wiel en sy kan nie wegtrek nie. Sollie het amper iets oorgekom toe Nollie op die gevaarlike stadium die deur oopmaak en begin uitklim! (sy het later gesê sy wou die groot klip wegrol!) Sollie het haar tot terug in die voertuig geskree en mooi verduidelik hoe sy moes vetgee! Net voor die olifant daar uit! Daar is honderde staaltjies, maar vir my en vir hom was ons jaarlikse naweekuitstappie na Kosi-baai 'n hoogtepunt. Dit was toe die kinders nog klein was en ons twee alleen kon gaan visvang. Sy bootjie het 'n klein kajuit en dus 'n slaapplek gehad. Ons het dag en nag visgevang. Baie vir my beteken in my persoonlike lewe ook, 'n ware vriend! Baie jare 'n staatmaker vennoot! Ek, maar ons almal sal hom nooit vergeet nie! Wonderlike herinneringe!

- Pettie

Op Alida se 21ste verjaarsdag vertel Oom Sollie met geur en kleur die storie van Alida se onmoontlike baba-jare. Die aanhoudende gehuil en gekerm wat net nie wou ent kry nie. Hy vat haar toe die een dag al huilend reguit swembad toe, sit haar daar neer op die plaveisel en begin vir haar bid. Sy skree blykbaar nog op hom: "Moenie vir my bid nie!" Almal van ons weet natuurlik wat die uiteinde van daardie storie is. Oom Sollie sê toe self - sy het van daardie dag af nog nooit ophou lag nie (selfs soms tot hulle verleentheid).

- Charné

My verhouding was met Nollie deur die gebedsgroep by Retha Prinsloo, maar toe die mat onder my uitgeruk is in 2010 het Sollie my gratis gehelp met regshulp en ek sal hom ewig dankbaar bly. Die Meintjesgesin is vir my 'n trofee van God se genade en inklusiewe liefde. Elke gesinslid is in plek en saam doen hulle ongelooflike liefdadigheidswerk. Dit sou nie moontlik gewees het sonder die patriarg van die familie nie. Sy aardse liggaam kon nie meer die verantwoordelikheid dra nie, maar ek weet in heerlikheid sal hy nooit weer val of ly nie. Hy het ingegaan in die vreugde van sy Heer. Krag en vertroosting toegebid aan Nollie en die familie.

- Hannetjie

Ons sal altyd die familie kuiers as kinders op die plot onthou en koester. Ons 3 niggies was só skaam vir Oom Sollie en het heeltyd gegiggel as ons hom sien - veral vir sy hare :-) Hy het altyd met ons grappies gemaak, kan net dink watse "fun" Oupa hy was!

- Christelle

As kind het ek so baie tyd in die Meintjes huis spandeer, wonderlike tye! My "beste" oom Sollie herhinnering was toe ek en Alidatjie saam hom gery het in so n wit sports kar met so lang neus (dink dit was n Nissan). Die kar het daar by FH Odendaal vasgehak in "reverse". Oom Sollie het met 2 histeriese, laggende meisiekinders van daar tot by die huis reverse met sy hare wat waai in die wind soos hy by die venster moes uitkyk! Tot vandag toe wil niemand my storie glo nie en ek lag nou nog as ek aan daardie dag dink. My hart is saam julle seer, en bid vir almal van julle in die hartseer tyd.

- Anri

Ons het in Dweza gekamp en een dag het die Petzer ouers saam met die seuns in die bos gaan stap. Hulle het net vertel hoe het hulle onder die bos uitgestap, op die strand uitgekom en die zebras het op die strand gedraf. 'n Ongelooflike gedagte prentjie. Toe gaan die Meintjes ouers met die meisies ook stap die volgende dag. Waar die staproete begin by die kamp terrein, is daar ‘n groot stomp oor die rivier. Ons het iets op die simpel kaart verkeerd gelees en verskriklik verdwaal. Toe sê Oom Sollie ons gaan nou saam met die vloei van die rivier loop, want dan moet ons een of ander tyd op die strand uitkom. Na 'n hele dag se stap langs 'n kronkel riviertjie, deur ruie bosse, (want ons was lankal af van die paadjie af) verwag ons heeltyd dat ons enige oomblik die strand panorama gaan sien. Maar wat sien ons, na 'n hele dag se stap? Dieselfde stomp waar ons begin het!

--

Oom Sollie het ook nie gekamp sonder sy staatmaker stokie pantoffels nie. Dis nie die regte ding vir Afrika vakansie nie, maar hy het dit altyd saamgevat. Een keer by Savuti in Botswana, het hy badkamer toe gestap met sy stokies. Deur die verskriklikste klitsgras. Sy stokies was so vol klitsgras dat hy dit nie meer kon aantrek nie. Hy het geweier om dit te aanvaar en die hele aand probeer om die klitse uit te kry. Hy het op die ou einde maar sy pantoffels by Savuti gelos.

- Jeanette

Oom Sollie was vir my soos 'n tweede pa in my kinderjare. "Salie en Bielie" se huis was soos my tweede huis. As ek aan oom Sollie dink, dink ek aan sy lok wat hy so oor sy kop "kam" (en sy dogters wat gedreig het om daai lok in sy slaap af te sny!) Ons was almal saam by Kosibaai. My pa se boot waarop ek was, het amper gesink - al ons piekniek chippies en koppies het amper oor die boot se rand weggedryf. Toe besluit ek oom Sollie se boot is beter, ek vertrou hom meer, ek gaan eerder verder saam met hom op sy boot. Op een stadium wil hy op 'n sandbank klim vanaf sy boot, maar onderskat hom met hoe diep die water nog daar is. Toe ek weer sien, is my skipper weg onder die water en al wat ek sien, is sy haarlok wat nog op die water dryf, TOE skreeu ek!

--

Ander herhinneringe: 'n Pula vir n soen! Hy het so sekere "look" gehad as hy diep in gedagte was, hy het sy lip vasgebyt en sy gesig so getrek. "Vanaand gaan ons lambardo!" En hy vryf sy lok oor sy kop. Die speelgoed wat uit laaie/kaste van sy veiling aankopies gekom het. Ons Trans Afrika trippies saam. Dan onderhandel oom Sollie 'n goeie deal vir 'n hout olifant of 'n ding, dan voel tannie Nollie so sleg dat die ou nou ingedoen is, sy gaan gee hom 'n klomp ou t-hemde agter oom Sollie se rug! "As jy kan aartiekeling, tiekeling, tiekeling, soos ek kan aartiekeling, tiekeling, tiekeling, dan aartiekeling, tiekeling, tiekeling, ons almal saam tiekeling, tiekeling!"

- Cilna